الجامع ,, والنساء ،، والرجال ،، والاطفال من الجنسين

[خاطرة مذبوحه]

بسم الله الرحمن الرحيم

اللهم صل على محمد وآله الطيبين الطاهرين

احبتي في الله

اذهلني منظر في الجامع ..

حيث الاطفال من الجنسين والفاصل الستار ..

والازعاج قائم ..


والاخوة الكرام يتهمون النساء بالازعاج ..


لا انكر ان الاطفال من الاخوات يصدرن الازعاج .. ولكن لا ينفي هذا الهدوء كله من الرجال ..


ولي نقطة اخرى على النساء ..


بعض الاخوات ,, اتجي وياها بناتها .. تخليهم ورى يولون .. وهي تصلي عنهم ,,

واذا قلنا ليها سكتي بناتش ,, تقول ويش اسوي مااقدر عليهم ..

ما عليه اخواتي .. علموهم الصلاة الجماعه ..

ما في الا وحده من بنات لجنة الماتم ,, تقوم ليهم ..

مو حاله ..

والامرّ ان الجهال لصبيان .. يدخلون من ورى الستاره اثناء الصلاة وحركات قايمة ..

اخواني جدوا حل للموضوع ..



وبالنسبة للرجال

بذكر موقف صار في الجامع ,, اتمنى انكم تحكمون

واثناء الدعاء ما بعد الفرض وحده من النسوان قالت يالله ورفعت صوتها شوي

ما شفنا الا رجال رافسنها ويقول سكتوا لاه ..

سكتت المراه عنه .. لكنه ما سكت ورد ضرب الستارة وصادت الضربه المراه ..

ليش عاد ..

رغم اني مااكون في الجامع متواجده الا مره او مرتين ..

بس في هالمرتين شفت هالاشياء ..



اتمنى انها تكون رساله للطرفين ..

واتمنى من اللجان المعنيه في ايجاد حل معين

واتمنى من الاخوات او الاخوة المتواجدين في الجامع بشكل يومي ,,, ايضاح الصوره ان كانت مخفية




خاطره

[الموهوب]

بسمه تعالى
السلام عليكم

شكرا اختنا فى لله على الموضوع
بصراحه و بدون مقدمات هناك ازعاج من الطرفين ,واكثر شى من جانب الرجال و السوالف فى كل زاويه ما فى احترام لدعاء او الخطيب و كأننا قاعدين فى (( سوق السمك )) انا هنا ما اقصد الكل طبعا هناك بعض المصلين ما عندهم خلفيه عن اذآب المساجد وانه يمنع السوالف فيها وخاصة اثناء الاذان والاقامه ......التى يجب ان نستجيب فيها الى النداء.........
وفى الختام لكم كل احترامى و اسمحوا لى اذا هفوت او تطاولت على احد .........وشكرا




مع تحيات الموهوب

[..:: شــــظـايـا ::..]

بل ...
اللي يصير في الجامع .. مشااااااااااااااااااااكل ..
وحده قاعده اتصلي و فالته بناتها يلعبون ..
حسبالها الحديقة ...
و اذا قلنا ليها شي .. شوفوا الكلام .. قبال كل كلمة .. عشرين ..


مشكوره أختي على طرح الموضوع

[نبوية]

السلام عليكم

اخيتي خاطرة مذبوحه ..

اشكر لك اهتمامك ..

لم ارد ان اطرح ردا في البيت .. لاني احببت ان ارى معدل الردود ..

اختي خاطره .. فعلا الموضوع موجود .. لكن لا حياة لمن تنادي ..


في اطفال يجون الجامع بدون اهاليهم .. وهم سبب الازعاج ..



لا اعتقد اذا كان فيه حل ..

ولكن نأمل ..


نبوية

---------------
خاطره مذبوحة ,, اذا جيتين الجامع ,, تعالي ليي ابغي اعرفش منهي ,, فيني فضول

[فطامي الصغيرة]

والله حاله

اني من زمان ما رحت الجامع بس اذا اروح

اجوف بنات واجد اجوب بدون اهاليهم او اسوون المكان مزبله مو مسجد

ما بطول في الكلام

مشكورة اختني نبويه على طرح الموضوع

[آفاق الغياب]

السلااااااااااااااام

بصراحة الجامع صاير ملجا اطفال وااااااااجد ازعاج من الطرفين بس الرجال اكثر , ولالالالا عاد الصبيان الي ورى يدخلون من الستارة ويفلتون على البنات ترب وين قاعدين ؟؟؟؟؟؟؟؟؟؟؟؟؟؟؟؟

مع سلااامة

[بن لادن]

الحل هو ان تصلي المراه في بيتها
انا عشت في هالحياه 29 عام وما عمري سمعت ان المراه تصلي في المسجد
هذي وجهة نظري
ملاحظه : وجهة النظر تحتمل الصواب والخطا

[sham3 Al7zen]

السلامُ عليكم ورحمةٌ من الله وبركاته ..

بدايةً لا عجيب في ما يحصل لأننا وللإسف لم ولن نصل الى مستوى من الرقيّ الذي وصلت اليهِ بعض البلدان ,9, ..

ببدأ وياكم شويّ عامي وخل نشوف ..
بقول لكم قصة او بالاحرى موقف عجبني ولكنيّ منه استغربت المهم ..
يوم سافرنا السعودية قبل ثلاث سنوات رحنا مسجد بكل معنى الكلمه وصخ! وصخ حده وازعاج وحاله حتى الحمام صاير في المسجد عزكم ربيّ يعني تخيلو الحال .. اني ما طقت اصليّ فيه البيت صلوا وفرغو وخلصو المهم دارت الايام وبيتنا كله يروحون السعودية عاد اللعام رحت وياهم ويا سلام على المسجد! كان روعـة بكل معنى الكلمه ! هدموه ووسووعوه وصار جميل جداً حيث من قبل كان واسع والحين عدلوه وسو قسمين للصلاه , قسم للصلون وعندهم جهال وقسم للمصلين الكبار والا يصلون جماعه !! عجبني التنظيم، وشئ ثاني كان عند الباب اول ما تدشوون ثنتين واقفين ويخذون الموبيلات " التلفونات " :tongue: من عند المصلية قبل لا تدش .. << حلاة التنظيم وصلينا وكان المسجد رائع نظيف ومعدل ويفتح النفس .. " الحين اكيد تقولون أو بالاحرى تسألون روحكم شجيب هذا لهذا؟
طيّب راح ادش في المفيد قلت روايتيّ عشان تشووفون الفرق !
شكثر الدول تطورت! واحنى قاعدين على الفقر سواء من كل النواحيّ والبلد على بالها التطور بس معناته بنايات وعمارات ونفظ وبترول وغفلوا الجانب الا راح يتحاسبون عليه يوم القيامه! الا هيّ صلاتهم وأعمالهم من الدنيا إلى الآخرة ..
الخلاصه! الا يصير هذا مو بس الذنب فيه النساء او الرجال او حتى الأطفال الذنب فيه الدوله الا مو قاعده تطور المبانيّ او المساجد المتعلقه بالتعليم الدينيّ والصلاه المفروض على الهيئة الجعفرية تتحرك ! تبدي رايها طيبّ بتقولون ايش تبدي وايش تقول !
في مثالي الا ذكرته فوق ..
التطور الي صار في المساجد ما كان تطوير فقط في المسجد بل ايضاً خلق فرص عمل ! شلون؟
البنتين الا واقفين على الباب ومعاهم بعد ثلاث بنات غير مسؤولين عن النظام وحتى من الجانب الرجالي ايضاً فيه يعني؟ البنات الا اهاليهم ما يرضون يشتغلون في أي مكان يقدرون يشتغلون هناك وبراتب زهيد حتى يحصلون على معاش وأجر وثواب من عند الله! هذا جانب ..

ونجي لجانب المصليّن سواء بنات او أولاد عليهم الإلتزام وهذا الشئ للأسف صعب! حتى في بيت الله في بيت الله الترقيم قايم والبلوتوثات شغاله واشياء إستغفر الله ... مو عارفين إنهم قاعدين في بيت الله, كل هذا قايم يصير من ضعف الوازع الديني والأخلاقي والانحطاط " سمحو حقي " من قبل بعض الشباب والشبات وإذا الدوله ما تقدر تطوّر منشئات الدينية على الفرد يطور نفسه بنفسه وهذا الشئ صاير صعب في وقتنا حيث لا إلتزام ولا أحترام!

اقف هُنا وليّ عودة!

[بن لادن]

وإذا الدوله ما تقدر تطوّر منشئات الدينية على الفرد يطور نفسه بنفسه وهذا الشئ صاير صعب في وقتنا حيث لا إلتزام ولا أحترام!

هذه العباره هي الاستنتاج من كلامك يا شمعة الحزن
انها صحيحه الله يكثر من امثالك

[صقر قريش]

هذا الشي مو بس في المسجد حتى الماتم
تعال ماتم السادة اذا في وفاة ما تقدر تقول عنه ماتم من الفوضة

[ملح الحياة]

اللهم صلي على محمد و آل محمد

بصراحة الإزعاج يصدر من الطرفين (( الرجال و النساء )) . .

ولكن هناك نقطة في غاية الأهمية . . وهي انني أكثر من مرة أصلي بالقرب من الستارة و أتفاجأ بالأخوات

ينزحن الستارة باتجاهي حتى تكاد تضربني لولا اجتنابي لها . . فأرجو من الأخوات المؤمنات التنبه لهذه النقطة . .

نسألكم الدعاء

[L.FiGO]

المفروض البنات يصلون في بيوتهم
المسجد حق الرجال